PECTEN Amazonius

PECTEN Amazonius

apud Statium Achilleid. l. 2. v. 159. ubi de variis saltationis modis, apud Veteres usitatis,

——— ——— Nunc obvia versae

Pectine Amazonio, modo quo citat orbe Lacaenas

Delia, plaudentesque suis intorquet Amyclis:

choreae genus est, Amazonibus olim usitatae, quae complicatae invicem serieque pectinis constitutae, choreas ducebant saltabant que. Pecten enim talis quaelibet series, quali constare pectines videmus. Ovid. Metam. l. 9. v. 297.

—— —— subsedit in illa

Ante fores arâ, dextroque est poplite laevum

Pressa genu, digitis inter se pectine iunctis

Sustinuit partus. ———

Ubi quid velit, enarrat Plin. l. 28. c. 6. Adsidere gravidis, vel cum remedium alicui adhibeatur, digitis pectinatim inter se implexis, veneficium est, idque compertum tradunt, Alcmenâ Herculem pariente: peius, si circa unum, ambove genua, item poplites alternis genibus imponi etc. Vide Casp. Barthium Animadversion. ad Statium d. l. De pisce vero huius nominis, Plinium passim inprimis l. 9. c. 33. et Voss. de Idol. l. 4. c. 19. ubi de pisce volitante huius nominis, et c. 36. ubi de Pectine, ostreaegenere.